Advertisement Contact

ஆரோக்கியச் சமையலுக்கு அஸ்திவாரம் என்ன,

சமையலுக்கு நாம் தேர்ந்தெடுக்கும் காய்கறிகள்தான்! தினசரி சமையலுக்கு எந்த காய் என்று முடிவு செய்தால் மட்டும் போதாது. அதை சத்துள்ள, ஃப்ரெஷ்ஷான காய்களாகத் தேர்ந்தெடுப்பது ஒரு கலை. கீரைகள், காய்கறிகளை எப்படித் தேர்ந்தெடுப்பது?

கீரை வகைகள்: கீரைகள் அன்று பறித்ததாய், புதியதாய், பசுமையாக, முகர்ந்து பார்த்தால் கெட்ட வாடை ஏதும் இல்லாமல் இருக்க வேண்டும். கீரைக் கட்டில் நடுப் பகுதியைப் பிரித்துப் பார்க்க வேண்டும் 'சொத சொத'வென்று வேர்கள் அழுகி ஈரப் பசை இல்லாமல் இருக்கிறதா என்று கவனிக்க வேண்டும். சாக்கடை ஓரங்களில் பறித்த கீரைகளை அழுகலும் வாசமும் காட்டிக் கொடுத்துவிடும்.

புதினா, கொத்தமல்லி இலைகள்: அதனதன் இயற்கை வாசத்துடன் இருக்கறதா என்று கவனித்து எடுக்க வேண்டும். கறிவேப்பிலை வாடாமல் புதியதாய், மணமாய், செங்காம்பு இலையாய், கொழுந்தாக இருக்க வேண்டும். எந்தக் கீரையாக இருந்தாலும் பூச்சி அரித்ததாக இருக்கக்கூடாது. ஒன்று இரண்டு ஓட்டைகள் இருந்தால் பரவாயில்லை என்று இயற்கை ஆர்வலர்கள் சொல்கிறார்கள்.


வாழைப்பூ: இதழ்களை மேலாகப் பிரித்துப் பார்த்தால் பூக்களின் நுனியில் கறுப்பு அடிக்காமல், பூ இளம் சிவப்பு நிறத்தில் இருக்க வேண்டும்.


குடமிளகாய்: காம்பு நல்ல அடர் பச்சை நிறத்தில் தோல் சுருங்காமல் இருக்க வேண்டும்.


டபுள் பீன்ஸ்ஸை தடவினால், அதனுள் இருக்கும் கொட்டைகள் நன்கு பெரியதாக இருக்க வேண்டும்.


அவரை: காய்களுக்குள் விதைகள் புடைத்து தெரியக்கூடாது. நாட்டுக் காயாக இருக்க வேண்டும்.


கோவைக்காய்: முழுக் காயும் பச்சை நிறமாக இருக்க வேண்டும். காயின் நடுவே சிவப்பு நிறம் காணப்பட்டால் உள்ளே பழுத்திருக்கும். ருசியாகவும் இருக்காது. அதன் மருத்துவக் குணமும் நமக்குக் கிடைக்காது.


பச்சை பட்டாணி: விதைகள் நன்கு முற்றி பெரிதாகவும், நெருக்கமாகவும் இருந்தால் நல்லது.


பூண்டு: நாட்டுப் பூண்டு, மலைப் பூண்டு எதுவாக இருந்தாலும் மேல் தோல் ஈரம் இல்லாமல் சருகாயும், பல், பல்லாகவும் இருக்க வேண்டும். சில பூண்டுகளில் விரல்களை வைத்தால் அமுங்கும். சொத்தையும் இருக்கும். அவைகளைத் தவிர்த்து விட வேண்டும்.


கற்றாழை: சதைப் பற்றுடன் தடிப்புடன் இருந்தால்தான் நடுவில் உள்ள ஜெல் பகுதி அதிகம் இருக்கும்.


சௌ சௌ: பெரியதாக இல்லாமல் நடுத்தரமாகவும், இளம் பச்சை நிறத்தில் பிளவுகள் அதிகம் இல்லாமல் இருக்க வேண்டும்.


கொத்தவரை: காயை லேசாக வளைத்தால் வளைய வேண்டும். பட்டுனு உடைந்தால் அது முற்றல்தான். தவிர்த்து விடுங்கள்.


மனத்தக்காளிக்காய்: சிறு சிறு குந்து மணிகளாய் பசுமையான நிறத்தில் இருக்க வேண்டும். காய்கள் பழுத்திருக்கக்கூடாது.


வெண்டைக்காய்: விரல் நீளத்திற்கு பசுமையாக, நுனியை உடைத்தால் பட்டென்று உடைய வேண்டும்.


புரோக்கலி: அடர்த்தியாய் கரும் பச்சையில் புதிய பூவாக வாங்க வேண்டும்.


காலிஃபிளவர்: லேசான மஞ்சள் நிறத்தில் இருந்தால் மருந்து அடிக்காதது என்று சொல்கிறார்கள். பூ அடர்த்தியாக, பூச்செண்டு போல் இருக்க வேண்டும்.

மக்காச் சோளம்: வாங்கும்போது, மேலே போர்த்தியிருக்கும் சருகு போன்ற பகுதிக்கு அடியில் இருக்கும் சோள முத்தை நகத்தை வைத்து லேசாக அழுத்திப் பார்க்க வேண்டும். நகம் மெதுவாகச் சென்றால், சோளம் சரியான பதத்தில் விளைந்திருக்கிறது என்று அர்த்தம். இதுவேக வைத்து உதிர்த்துச் சாப்பிடுவதற்குச் சரியான பதம்.


முள்ளங்கி: நீளமாக, வெண்மையாக, கீரையுடன் கூடியதாக இருந்து, நகத்தால் கீறினால் தோல் மென்மையாகவும் இருக்க வேண்டும்.


பாகற்காய்: இளம் பச்சையாய், உருண்டையாகவும், விதைகள் புடைத்துக் கொண்டு தெரியாமலும் இருக்க வேண்டும். மேல் தோலின் மேல் இருக்கும் செதில் போன்ற பகுதி அடர்த்தியாக இருக்க வேண்டும்.


வெண் பூசணி: காய் நன்கு விளைந்ததாய், நுடத்தர அளவில் விதைகள் முற்றி சதைப் பகுதி மிருதுவாய் இருக்கும்படி பார்த்து வாங்க வேண்டும்.


சிவப்பு பூசணி: நல்ல அடர் ஆரஞ்சும், மஞ்சளும் கலந்த நிறத்தில் இருக்க வேண்டும். விதைகள் முற்றி இருந்தால்தான் இருப்பு ருசியாக இருக்கும்.


வாழைக்காய்: கீழ் நுனி மஞ்சள் நிறம் இல்லாமல் இருக்க வேண்டும். காம்பு பச்சையாக இருக்க வேண்டும். காம்பு பழுத்து 'பொத பொத' வென்று இருந்தால், வாழைக்காய் பாதி பழுத்து விட்டதென அர்த்தம்.


வாழைத்தண்டு: அடிப்பகுதி பெரிதாய் இருந்தால் நார் அதிகம் இருக்கும். எளிதில் செரிக்க, நடுப் பகுதி, மேல் பகுதி எல்லாம் இளம் தண்டாக இருக்கணும்.


வௌ்ளரிக்காயை: நகத்தில் கிள்ளிப் பார்த்தால் நகர் சுலபமாக உள்ளே இறங்க வேண்டும். சாலட் செய்ய விதைகள் குறைவாக உள்ளதை வாங்க வேண்டும்.


கத்தரிக்காய்: இளம் நீலத்துடன் பச்சை நிறம் கலந்து இருக்க வேண்டும். தோல் மிருதுவாய், காம்பு நுனி வரை பச்சை நிறத்துடன் இருக்க வேண்டும்.


பெரிய கத்தரிக்காய்: நன்கு பெரிதாய், குண்டாய் தோல் மெத்தென்று இருக்க வேண்டும். இது சட்னிக்கு, மசியலுக்கு ருசியாக இருக்கும்.


முருங்கைக்காயை: இரண்டு நுனிகளையும் பிடித்து முறுக்கினால் நன்கு வளைந்து அதன் விதைகள் புடைத்துத் தெரியாமல் இருக்க வேண்டும்.


பச்சை மிளகாய்: அடர் பச்சையில் நீளமாக (சம்பா), குண்டாக இரண்டு விதங்களிலும் வாங்கலாம்.


பெல்லாரி வெங்காயம்: மேல் தோல் ரோஜா நிறத்துடன், நுனிப் பகுதி அழுத்தினால் கெட்டியாகவும் இருக்க வேண்டும்.


வௌ்ளை வெங்காயம்: மேல் தோல் வௌ்ளையாக கிள்ளினால் சாறு வரும்படி இருக்க வேண்டும்.


வெங்காயத் தாள்: பச்சை நிறத்தில் மேல் நுனி வௌ்ளைப் பூக்களுடன், அடி வேர் நுனி சின்ன சைஸ் வெங்காயத்துடன் இருக்க வேண்டும்.


சின்ன வெங்காயம்: ரோஜா நிறத்தில், குட்டி குட்டியாய், வெங்காயத்தின் நுனி அழுகாமலும், நுனி முளை விடாதபடியும் இருக்க வேண்டும்.


இஞ்சி: கணுக்கள் குறைவாக, நடுப்பகுதி இஞ்சியாக இருக்கவேண்டும். அப்பொழுதுதான் நார் குறைவாக இருக்கும். தோலை சுரண்டினால் எளிதில் உரிந்து வரவேண்டும்.


கருணைக் கிழங்கு: பெரிய அளவில் வெட்டினால், வெட்டிய பகுதி இளம் சிவப்பு நிறத்தில் கெட்டியாக இருக்க வேண்டும்.


சேப்பங்கிழங்கு: சின்ன உருண்டைகளாக ஒன்று போல் இருக்க வேண்டும்.


உருளைக்கிழங்கு: செம்மன் வாசத்துடன் உருண்டையாய், கெட்டியாகவும், மஞ்சள் நிறத்திலும் இருக்க வேண்டும். மஞ்சள் நிறத்தின் இடையே நடுவில் பச்சை நிறத்தில் நரம்பு போன்ற வரிகள் இல்லாமல் இருக்க வேண்டும். தோலை எளிதாக சுரண்ட வந்தால் அதுதான் புதுக் கிழங்கு.


மரவள்ளிக் கிழங்கு: மண்துகள்கள் ஒட்டிய நிலையில் உருண்டு திரண்ட கிழங்குகளை தேர்வு செய்யுங்கள். தோலைச் கீறினால் மஞ்சள் நிறம் இருக்ககூடாது. பால் போல் வௌ்ளையாக இருந்தால் அது தான் புதுக் கிழங்கு.

மாங்காய் ஊறுகாய்: போடுவதற்கு கிளி மூக்குமாங்காயில் பெரியதாக அடர் பச்சை நிறத்தில் வாங்க வேண்டும். தட்டிப் பார்த்தால் சத்தம் வரும்.


வடுமாங்காய்: காம்புகளுடன் கூடிய, உருண்டையான, வெம்பாத, பழுக்காத பிஞ்சுகளாக ஒரே சைஸில் இருக்கணும்.


முட்டைக்கோஸ்: கெட்டியாக, உருண்டையாக, பசுமையாக இருக்க வேண்டும். நடுத்தண்டு புதியதாக இருக்கும்படி பார்த்து வாங்கவும்.


தேங்காய்: பெரிதான சட்டி போன்ற காய்கள் வேண்டாம். நீளவாக்கில் உள்ள காய்களின் பருப்பு, கூடுதலான இனிப்பு சுவையுடன் இருக்கும். மூன்று கண் உள்ள பகுதி கறுப்பு தட்டாததாகப் பார்த்து எடுக்கவும். காயை காதருகில் வைத்து ஆட்டினால் நீர் ஆடும் சத்தம் கேட்க வேண்டும்.


சுண்டைக்காய்: வாங்கும்போது, பால் சுண்டைக்காய் என்று கேட்டு வாங்கவும். இளம் பச்சையாக அதிகம் முற்றாததாக இருக்க வேண்டும்.


சுரைக்காய்: நீள வடிவு, குண்டு ரகம் என இரண்டு வகைகளில் கிடைக்கும். தோல் பசுமையாக இருந்து நகர் சுலபமாக பதிய வேண்டும்.


சோயா பீன்ஸ்: விதைகள் முற்றி இருப்பதைத் தான் தேர்வு செய்ய வேண்டும்.


எலுமிச்சம் பழம்: நல்ல பசு மஞ்சள் நிறத்தில் மெல்லிய தோல் உடையதாகவும், தோலின் மேல் கரும்புள்ளி இல்லாததாகவும் இருக்க வேண்டும்.


தக்காளிப் பழம்: நாட்டுத் தக்காளி, பெங்களூரு தக்காளி இரண்டு வகைகளிலுமே நன்கு சிவந்து கெட்டியானதாகவும், காயாகவும் பார்த்து எடுக்க வேண்டும். தோல் பகுதி கொழகொழப்பாக இருந்தால் சீக்கிரம் கெட்டு போய் விடும்.


கறிவேப்பிலை: செங்காம்புடன் கூடிய தளிர் இலைகளாகப் பார்த்து வாங்கவும். வேப்பிலை போல இருக்கும் கறிவேப்பிலைகளில் மணம், ருசி இருக்காது.


பீட்ரூட்: நல்ல சிவப்பு நிறத்தில் கெட்டியாகவும் உருண்டையாகவும் இருக்க வேண்டும். கிள்ளினால் சிவப்பு நிறச் சாறு நம் கைகளில் ஒட்ட வேண்டும்.


பீர்க்கங்காய்: குண்டு ரகத்தை விட, கரும்பச்சையில் நீளவாக்கில் வரும் காய்களுக்குத்தான் ருசி அதிகம்.


காராமணிக்காய்: பசுமையுடன் கூடிய இளம் காய்களாகத் தேர்வு செய்ய வேண்டும். முற்றிய காய்களில் நார் அதிகம் இருந்து ருசியைக் கெடுக்கும்.


கேரட்: நல்ல ஆரஞ்சு நிறத்தில் இளசாகவே தேர்வு செய்யுங்கள். பெரிய கேரட்களில் நடுப்பகுதி சுவையாக இருக்காது.


நெல்லிக்காய்: பச்சையாக, பெரியதாக இருக்க வேண்டும். கரும்புள்ளி இருக்கக்கூடாது.


காளான்: நல்ல வெண்மை நிறமாக இருக்க வேண்டும். முழுக்காளானிலும் கறுப்பு பகுதி இல்லாமல், திடமாக இருக்க வேண்டும். லேசான பழுப்பு நிறம் இருந்தாலும் அந்தக் காளான் வேண்டாம்.


நார்த்தங்காய்: பெரியதாய், கரும்பச்சை நிறத்தில் கனமுள்ளதாகத் தேர்ந்தெடுக்க வேண்டும். அப்பொழுதுதான் காயினுள் சாறு அதிகம் இருக்கும்.

தேர்ந்தெடுக்கும் காய்கறிகளை நிறைய வாங்கி ஃப்ரிட்ஜில் அடைத்து வைக்காதீர்கள். அனறாடம் புதியதாய் வாங்கும் கீரை வகைகளிலும், காய்கறிகளிலும்தான் ஆரோக்கிய சமையலுக்கு ஏற்ற சத்துக்கள் அதிகம் கிடைக்கும். காய்கறிகளில் இருக்கும் பூச்சி மருந்துகள் நம் வயிற்றுக்குள் போகாமல் இருக்க, காய்கறிகளை நன்கு கழுவிய பிறகே, சமையலுக்குப் பயன்படுத்த வேண்டும்.

Cinema Trailers